Þóra: Kom okkur á óvart að skora svona snemma

Þóra Björg Helgadóttir, markvörður íslenska liðsins talaði um að of góð byrjun hafi kannski ruglað íslenska liðið aðeins í ríminu í 1-3 tapi á móti Frökkum í kvöld en íslenska liðið komst yfir eftir aðeins tæpar sex mínútur í leiknum.

„Ég held að það hafi komið okkur svolítið á óvart að hafa náð að setja á þær mark svona snemma. Við vorum ekki alveg tilbúnar í það því spennustigið var alltof hátt. Við vorum ekki að spila boltanum í fætur, leikskipulagið sem við höfum sett upp var ekki að ganga því við vorum ekki að klára það nægilega vel. Það voru alltof margar feilsendingar og dýr mistök sem kostuðu okkur stig í dag," sagði Þóra.

„Við þurfum að hafa svolitla lukku með okkur í þessum leikjum og vonandi kemur hún í næstu tveimur leikjum," sagði Þóra en hún veit að það mun reyna áfram mikið á varnarleik liðsins.

„Það er mikil pressa á markmanninum og það gekk vel þar til þriðja markið kom. Það má alveg búast að það verið svipað á móti Noregi og að það muni mæða mikið á vörninni. Við þurfum þá að halda betur en við gerðum í dag," sagði Þóra.