„Á­nægður að spila ekki betur en þetta en vinna samt“

Valsmenn þurftu heldur betur að hafa fyrir hlutunum í leik kvöldsins, sem leikinn var í Seljaskóla sökum þess að Skógarselið var upptekið undir tónleika MC Gauta. Lokatölur 82-85, í hörkuleik.

„Það var svona retro-stemning hérna í Seljaskóla í kvöld,“ sagði Finnur í leikslok. 

„Það er gaman að koma hérna. Seljaskóli og Ljónagryfjan. Þetta eru svona alvöru gryfjur og það er gaman að spila hérna. ÍR-ingarnir, studdir vel af sínu fólki, eru bara drulluflottir. Það er erfitt að vinna á útivelli í þessari deild og við vorum með mislagðar hendur á löngum köflum, en ég er ánægður með að spila ekki betur en þetta en vinna samt.“

Hann segir að það hafi verið mikilvægt að ná að endurstilla liðið í hálfleik, eftir að ÍR-ingar voru búnir að ná að hleypa leiknum upp.

„Okkur er búið að ganga bara mjög vel undanfarið og þá fer kannski að slakna aðeins á mönnum. Þessir tveir leikir í vikunni eru kannski ekki búnir að vera neitt sérstaklega góðir. En þá er kannski bara fínt að fá smá hörku og aðeins að minna menn á að það þarf að hafa fyrir þessu.“

„Við erum enn að læra á hópinn og það er mikil hlutverkabreyting við það að fá Keyshawn Woods inn í þetta og við þurfum að ná að tvinna þetta saman.“

Hann segir þó að Valsmenn muni líklega ekki nýta jólafríið í að æfa grunnatriðin, þrátt fyrir að þau hafi ekki verið að ganga sem skyldi í kvöld.

„Ég held að það séu fáir í meistaraflokki að vinna eitthvað sérstaklega í lay-up æfingum og vítaæfingum. Ég held að það sé bara eitthvað sem snýr að einbeitingu og þess háttar. Ég veit alveg að þessir strákar eru þannig að þegar þeir mæta klárir þá eru þeir klárir. Ég hef engar áhyggjur af þeim í þessum aðstæðum,“ sagði Finnur að lokum.