UEFA óttast að mörg ensk félög geti farið á hausinn

Knattspyrnusamband Evrópu, hefur áhyggjur af eyðslu margra félaga í ensku úrvalsdeildinni og óttast að mörg þeirra muni ekki ráða við útgjöldin enda hafa mörg lið sett mikinn pening í að reyna að styrkja leikmannahópa sína.

Heimskreppan hefur sín áhrif í fótboltanum og er almennt talið að menn hafi aðeins séð upphafið af þeim kröggum sem liðin gætu þurft að ganga í gegnum á næstu misserum.

David Taylor, framkvæmdastjóri UEFA, tjáði sig um áhyggjur sambandsins við BBC og notaði örlög Leeds United sem víti til varnaðar.

Leeds fór á hausinn aðeins nokkrum árum eftir að félagið hafði komist inn í undanúrslit Meistaradeildar Evrópu. Þar var boginn spenntur alltof hátt og UEFA óttast að svipað gæti verið í fæðingu hjá nokkrum ensku félaganna.

„Það eru slæmar fréttir af peningamálum margra félaga í enska boltanum og það eru vissulega áhyggjuefni," sagði Taylor sem var áður framkvæmdastjóri skoska sambandsins.

„Við höfum áhyggjur af þessari þróun og vonumst til að félögin fari að huga þessum málum og reyna að byggja upp fjárhagsstöðu sína til framtíðar," sagði Taylor.