Umfjöllun: Þróttur heldur í veika von - meiri spenna á toppnum

Þróttur og FH skildu jöfn eftir markalausan leik á Valbjarnarvelli í kvöld. Með stiginu halda Þróttarar í veika von um að bjarga sæti sínu í deildinni.

Þróttur er nú níu stigum á eftir Grindavík og ÍBV þegar níu stig eru enn í pottinum. Liðið er þar að auki með lakara markahlutfall en bæði þessi lið. En möguleikinn er vissulega fyrir hendi hjá Þrótturum.

FH er nú með fimm stiga forystu á KR þegar þrjár umferðir eru eftir í deildinni og níu stig í pottinum. Úrslitin halda því einnig smá spennu í titilbaráttunni.

Heimamenn byrjuðu leikinn af ágætum krafti og ætluðu greinilega að selja sig dýrt - enda allt undir hjá Þrótturum. En fljótlega náðu FH-ingar undirtökunum í leiknum og átti Hjörtur Logi Valgarðsson fínt skot úr aukaspyrnu sem hafnaði í slánni. Það gerðist á níundu mínútu og stuttu síðar komst Alexander Söderlund í gott færi sem var vel varið hjá Henryk Boedker.

Leikurinn koðnaði niður eftir þetta og gerðist ekki mikið inn á vellinum ef frá eru talin tvö ágæt færi FH-inga. Í fyrra skiptið varði Hafþór Ægir Vilhjálmsson skot Atla Viðars Björnssonar á línu og í það síðara varði Boedker vel á markinu skalla Matthíasar Vilhjálmssonar.

En annars var fátt um fína drætti í fyrri hálfleik og hvorugt lið að spila sérstakan fótbolta.

Eftir fremur rólega byrjun í síðari hálfleik tóku FH-ingar völdin á vellinum á ný og sköpuðu sér sín hættulegustu færi í leiknum. Fyrst komst Hjörtur Logi einn í gegnum vörn Þróttara en Boedker varði vel frá honum. Atli Viðar komst svo í næstu sókn í frábært skotfæri en dúndraði knattinum langt framhjá.

FH-ingar sóttu stíft um miðbik síðari hálfleiksins og Þróttarar gerðu vel til þess að verjast hverri stórsókn þeirra á eftir annarri.

Heimamenn komust svo í hættulega skyndisókn á 81. mínútu þar sem þeir hefðu hæglega getað stolið sigrinum. Hafþór Ægir Vilhjálmsson náði að snúa af sér Sverri Garðarsson og kom skoti að marki. Það fór framhjá Daða í markinu en Andrew Malsom var nálægt því að ná að fylgja því eftir með því að skora í autt markið. En Sverrir náði að bjarga því fyrir horn á síðustu stundu.

Stuttu síðar átti Þórður Steinar Hreiðarsson skot í stöng á marki FH-inga eftir fína sókn og sendingu Magnúsar Más Lúðvíkssonar. Þórður Steinar komst svo í aftur gott skotfæri stuttu síðar en í þetta sinn varði Daði Lárusson vel í marki FH.

Bæði lið sóttu nokkuð stíft á lokamínútum leiksins en allt kom fyrir ekki og liðin urðu að sætta sig við skiptan hlut. Leikmenn beggja liða gengu því ósáttir af velli.

Þróttur - FH 0-0

Valbjarnarvöllur. Áhorfendur: Óuppgefið

Dómari: Kristinn Jakobsson (7)

Skot (á mark): 9-12 (4-7)

Varin skot: Boedker 5 - Daði 3.

Horn: 2-10

Aukaspyrnur fengnar: 8-12

Rangstöður: 0-0

Þróttur (4-3-3):

Henryk Boedker 7 - maður leiksins

Jón Ragnar Jónsson 7

Dusan Ivkovic 7

Dennis Danry 7

Þórður Steinar Hreiðarsson 6

Kristján Ómar Björnsson 5

Oddur Ingi Guðmundsson 5

(70. Andrés Vilhjálmsson -)

Hallur Hallsson 6

Morten Smidt 6

Samuel Malsom 5

Hafþór Ægir Vilhjálmsson 7

(90. Vilhjálmur Pálmason -)

FH (4-3-3):

Daði Lárusson 7

Matthías Vilhjálmsson 6

Sverrir Garðarsson 6

Tommy Nielsen 7

Freyr Bjarnason 6

Kristján Gauti Emilsson 5

(59. Atli Guðnason 6)

Hjörtur Logi Valgarðsson 6

Davíð Þór Viðarsson 5

Atli Viðar Björnsson 5

Alexander Söderlund 5

(76, Brynjar Benediktsson -)

Ólafur Páll Snorrason 6

Leiknum var lýst á Boltavakt Vísis og Fréttablaðsins og má lesa lýsinguna hér: Þróttur - FH.