Terry upp með sér vegna áhuga City

John Terry segist hafa verið upp með sér vegna áhuga Manchester City en lengra hafi það ekki náð. Hann hafi ekki viljað fara til félagsins.

City bauð tvívegis í Terry en í bæði skiptin var tilboðinu hafnað. Framtíð Terry var þó óljós þar til hann gaf frá sér yfirlýsingu í lok síðasta mánaðar þar sem hann sagðist ætla vera áfram í herbúðum Chelsea.

„Ef ég hefði freistast af þessu tilboði hefði ég farið," sagði Terry í samtali við enska fjölmiðla. „Ég var upp með mér vegna tilboðsins en lengra náði það ekki. Tilboðið var upp á 28 milljónir punda en ég veit ekki hvað þeir voru tilbúnir að borga mér."

„Ég fékk símtal frá Peter Kenyon (framkvæmdarstjóra Chelsea) og sagði honum að ég vildi ekki fara."