Arnar Grétars: Ætlum okkur klárlega þrjú stig

Breiðablik beið afhroð á Valbjarnarvelli í síðustu umferð Pepsi-deildarinnar. Leikmenn liðsins eru væntanlega staðráðnir í að bæta upp fyrir það í kvöld þegar þeir taka á móti botnliði ÍBV á Kópavogsvelli.

„Það er aldrei gott að tapa og sérstaklega ekki 4-0. Þessi leikur gegn Þrótti var samt furðulegur. Ég vil meina að við höfum verið að spila vel fram að þriðja markinu. En við gerðum skelfileg mistök, menn þurfa að dekka í hornum og svo gefum við þeim annað markið. Þar að auki vorum við ekki að nýta okkar færi," segir Arnar Grétarsson, spilandi aðstoðarþjálfari Breiðabliks.

„Í sumar höfum við oft verið að spila vel en erum ekki að nýta okkar færi. Svo gefum við ódýr mörk, mörg mörk úr föstum leikatriðum. Þessi leikur í kvöld er rosalega mikilvægur til að koma okkur frá botninum og við ætlum okkur klárlega þrjú stig. Við höfum ekki verið í þessum botnpakka hingað til en ef við töpum í kvöld sogumst við meira inn í hann."

„Við eigum svo FH næsta sunnudag og mjög mikilvægan bikarleik fyrir Verslunarmannahelgi. Þar eigum við möguleika á að bjarga einhverju út úr sumrinu. Það er samt ljóst í þessari deild að ef maður nær góðu skriði þá er þetta rosalega fljótt að breytast. Ef menn taka nokkra sigra í röð þá er staðan allt í einu orðin allt önnur," segir Arnar.

Breiðablik hefur fengið einn leikmann í félagaskiptaglugganum, Guðmund Pétursson á láni frá KR. Guðmundur kom inn sem varamaður gegn Þrótti. „Guðmundur hefur komið mér skemmtilega á óvart og hann kemur með aukna samkeppni fram á við. Ég hafði bara séð hann þegar hann var að koma inn sem varamaður hjá KR. Hann virkar líkamlega sterkur og hefur meira en það, hann er fínn á boltann og alhliða góður leikmaður. Mér finnst hann veruleg búbót," segir Arnar.

Leikur Breiðabliks og ÍBV hefst klukkan 19:15 í kvöld en þrír aðrir leikir verða í Pepsi-deildinni í kvöld. Á sama tíma mætast Fjölnir og Valur í Grafarvogi og Keflavík fær Fylki í heimsókn. Klukkan 20 hefst síðan leikur Stjörnunnar og Þróttar beint á Stöð 2 Sport.