Zola reynir að fá þrjá leikmenn frá Inter

Knattspyrnustjórinn Gianfranco Zola hjá West Ham er ekki búinn að gefa upp vonina um að fá þrjá leikmenn frá Ítalíumeisturum Inter í sumar.

Talið er að Lundúnafélögin West Ham og Tottenham séu að bítast um miðjumanninn Luis Jimenez frá Chile en hann fékk ekki mörg tækifæri með Inter á síðustu leiktíð.

„Ég bind miklar vonir við að Jimenez komi á Upton Park því hann er leikmaður að mínu skapi og ég er sannfærður um að við finnum lausn á vandamálum hans með að fá atvinnuleyfi á Englandi," segir Zola í samtali við Gazzetta dello Sport.

Talið er að West Ham sé að reyna að fá Jimenez á árs láni frá Inter með möguleikann að kaupa leikmanninn á 4 milljónir punda að lánstímanum loknum.

Gazzetta dello Sport heldur því reyndar fram að West Ham vonist einnig til þess að fá miðjumanninn Mancini og framherjann Mario Balotelli á svipuðum lánskjörum frá ítalska stórliðinu. En Balotelli hefur verið sterklega orðaður við West Ham allt frá því Zola tók við stöðu knattspyrnustjóra hjá West Ham.