Torres ætlar að vera áfram hjá Liverpool

Fernando Torres segir gyllitilboð annarra félaga ekki freista sín og hann ætli sér að vera áfram í herbúðum Liverpool.

Torres er 25 ára gamall og skrifaði nýverið undir nýjan samning við Liverpool sem gildir til loka tímabilsins 2013.

Hann hefur hins vegar verið orðaður við Manchester United sem er sagt reiðubúið að bjóða mikinn pening í Torres.

„Ég er mjög ánægður með minn samning og myndi ekki fara til annars félags þar sem ég væri ekki eins hamingjusamur til þess eins að þéna aðeins meiri pening."

„Það væri bara græðgi að fara fram á eitthvað meira. Ég verð áfram hjá Liverpool ef félagið vill halda mér," sagði hann.