Hughes vill ekki fara í orðastríð við Ferguson

Knattspyrnustjórinn Mark Hughes hjá Manchester City hefur svarað kollega sínum Sir Alex Ferguson hjá nágrönnunum í Manchester United eftir að sá síðarnefndi gagnrýndi harðlega auglýsingaherferð City fyrir komandi tímabil.

í herferðinni má sjá mynd af Carlos Tevez, sem gekk í raðir City í sumar eftir tveggja ára lánstíma hjá United, undir yfirskriftinni: Carlos Tevez, velkominn til Manchester.

Hughes vill meina að þetta sé afar saklaust og ekkert til þess að gera veður útaf.

„Ég vill ekki vera að gera of mikið mál úr þessu. Stundum þurfum við að svara fyrir okkur þegar farið er yfir strikið en þetta er klárlega ekki eitt af þeim tilfellum. Mér fannst þetta vera allt í lagi, en þetta veggspjald fór greinilega eitthvað fyrir brjóstið á Sir Alex.

Ég held að þetta hafi annars verið hugsað sem smá grín fyrir stuðningsmenn félaganna og ég held að þetta hafi verið tekið þannig í flestum tilfellum," segir Hughes.