Whelan: Ekki möguleiki að Owen kom til Wigan

Dave Whelan, stjórnarformaðurinn málglaði hjá Wigan, hefur þverneitað því að félagið sé tilbúið að bjóða Michael Owen risasamning til þess að freistast til þess að fá hinn 29 ára gamla framherja á JJB-leikvanginn.

Whelan var með í kapphlaupinu þegar Owen snéri aftur í enska boltann frá Real Madrid en varð þá að láta í minni pokann fyrir Newcastle. Fjögurra ára samningur Owen við Newcastle rennur út 1. júlí næstkomandi og umboðsskrifstofa leikmannsins hefur sent út kynningarbæklinga um leikmanninn til þess að reyna að sannfæra félög í ensku úrvalsdeildinni að Owen sé enn áhættunnar virði.

„Við fengum í fyrsta lagi ekki umræddan kynningarbækling í hendurnar og það er allt í lagi því við höfum ekki áhuga á leikmanninum lengur. Launakröfur hans eru út úr korti glórulausar og síðan efast ég um að hann hafi sama vilja og metnað til að standa sig í úrvalsdeildinni og hann hafði áður. Ég vona að hann nái sér á strik því ég hef miklar mætur á honum og var tilbúinn að borga fimmtán milljónir punda fyrir hann á sínum tíma. Launakröfur hans upp á 110 þúsund pund á viku eru hins vegar c.a. fjórum sinnum meira en við værum tilbúnir að borga hjá Wigan," segir Whelan.

Ensku úrvalsdeildarfélögin Aston Villa og Everton eru einnig búin að lýsa því yfir að þau séu ekki á eftir Owen.