Umfjöllun: Stjarnan með enn einn stórleikinn

Valsmenn mættu á Stjörnuvöll í kvöld og var um sannkallaðan sex stiga leik að ræða. Liðin sátu í öðru og þriðja sæti með jafn mörg stig, Stjarnan var þó með betri markatölu. Valsmenn voru aldrei inni í leiknum og voru heppnir að tapa ekki stærra. Stjarnan sýndi enn einu sinni að þeir eru með eitt skemmtilegasta lið deildarinnar.

Fyrsta markið kom strax á áttundu mínútu en það var Ellert Hreinsson sem skoraði eftir fyrirgjöf frá Guðna Rúnari Helgasyni. Ellert var illa dekkaður á fjærstönginni og kláraði færið stöngin inn.

Stjarnan var gjörsamlega með undirtökin eftir markið og Valsmenn náðu aldrei að ógna. Pétur Markan átti þó fínt færi en Guðni Rúnar komst fyrir boltann. Atli Sveinn átti síðan sláarskot af um fjörutíu metra færi. Þetta var það sem stóð upp úr hjá Valsmönnum í leiknum.

Arnar Már Björgvinsson skoraði síðan á 42. mínútu og staðan því 2:0 í hálfleik. Sanngjarnt. Margir bjuggust við Valsmönnum grimmari, því mikið vantaði uppá. Sóknarleikur liðsins var í molum og Stjörnumenn gerðu það sem þeir vildu allan leikinn.

Ellert Hreinsson skoraði síðan þriðja markið á 58. mínútu með skalla, glæsilegt mark og algjörlega verðskuldað. Eftir þetta var sem Valsmenn gæfust upp og var lánleysið að narta í hælana á þeim það sem eftir lifði leiks. Stjörnumenn héldu enn undirtökunum og kláruðu leikinn nokkuð öruggt.

Nýliðar Stjörnunnar eru ekki lengur ungt og efnilegt lið heldur eru þeir klárlega orðnir eitt besta lið deildarinnar. Það er gaman að horfa á þá spila og Valsmenn áttu engin svör í kvöld. Stjarnan verður í efri hlutanum í lok móts með þessu áframhaldi.

Það var helst Haraldur Björnsson markvörður Vals sem var ljósi punkturinn í leik liðsins í kvöld. Hann varði oft á tíðum glæsilega og er til alls líklegur í sumar.

Hjá Stjörnunni voru það Arnar Már Björgvinsson og Ellert Hreinsson sem stóðu upp úr. Allt liðið lék reyndar vel en lítið reyndi á markvörð þeirra í leiknum. Aftasta línan hjá Stjörnunni var örugg og gaf engin færi á sér.

Leiknum var lýst beint á Boltavakt Vísis og Fréttablaðsins. Hægt er að skoða lýsinguna með því að smella hér: Stjarnan - Valur