Umfjöllun: Blikar unnu loks í Grindavík

Breiðablik vann 1-0 útisigur á Grindavík í kvöld. Kristinn Steindórsson skoraði eina mark leiksins í seinni hálfleiknum en leikurinn var hálfleikjaskiptur, heimamenn sterkari í þeim fyrri en gestirnir í síðari.

Grindvíkingar byrjuðu mun betur og Gilles Ondo var mjög líflegur á upphafskafla leiksins. Átti hann meðal annars þrumuskot sem fór naumlega framhjá.

Blikar áttu undir högg að sækja en fengu örfáar álitlegar sóknir. Þeir gerðu tilkall til vítaspyrnu þegar Alfreð Finnbogason renndi knettinum á Arnar Grétarsson sem féll í teignum eftir tæklingu Zoran Stamenic. Arnar var alls ekki sáttur við að Þóroddur Hjaltalín dómari dæmdi ekkert.

Þrátt fyrir að vera mun meira með knöttinn sköpuðu Grindvíkingar sér ekki mörg opin færi og staðan markalaus í hálfleik. Allt annað var að sjá til Breiðabliks í seinni hálfleiknum, þeir komu mun ákveðnari til leiks og sóttu stíft.

Það skilaði marki á 57. mínútu þegar Alfreð átti baneitraða sendingu á Kristinn sem kláraði færið frábærlega og Blikar komnir yfir. Skömmu seinna átti Alfreð aðra svipaða sendingu, að þessu sinni á hinn efnilega Andra Rafn Yeoman sem náði ekki að skora þrátt fyrir mjög gott færi.

Blikar héldu áfram að ráða lögum og lofum á vellunum en undir lokin voru Grindvíkingar þó nokkuð aðgangsharðir. Scott Ramsey átti hörkuskot sem Sigmar Ingi Sigurðarson í marki Blika varði vel. Sigmar fór í markið á 70. mínútu í stað Ingvars Kale sem meiddist á nára.

Sterkur sigur hjá Blikum en Kópavogsliðið hafði fyrir leikinn aldrei unnið sigur á Grindavíkurvelli í efstu deild.

Grindavík - Breiðablik 0-1

0-1 Kristinn Steindórsson (57.)

Grindavíkurvöllur. Áhorfendur: 815.

Dómari: Þóroddur Hjaltalín (7)

Skot (á mark): 11-12 (5-5)

Varin skot: Óskar 3 - Ingvar 3, Sigmar 2

Horn: 4-7

Rangstöður: 1-2

Aukaspyrnur fengnar: 9-10

Grindavík 4-3-3

Óskar Pétursson 6

Óli Baldur Bjarnason 5

Zoran Stamenic 6

Bogi Rafn Einarsson 5

Ray Anthony Jónsson 5

Orri Freyr Hjaltalín 5

Jóhann Helgason 5

Scott Ramsey 5

Gilles Mbang Ondo 6

Jósef Kristinn Jósefsson 7

Þórarinn Kristjánsson 3

(66. Eysteinn Hauksson 4)

Breiðablik 4-3-3

Ingvar Kale 6

(70. Sigmar Sigurðarson 6)

Árni Kristinn Gunnarsson 6

Elfar Freyr Helgason 7

Kári Ársælsson 7

Kristinn Jónsson 6

Finnur Orri Margeirsson 8* Maður leiksins

Andri Rafn Yeoman 7

Arnar Grétarsson 7

Olgeir Sigurgeirsson 5

Kristinn Steindórsson 6

Alfreð Finnbogason 7

Smelltu hér til að opna Boltavaktina og lesa lýsingu leiksins: Grindavík - Breiðablik