Enska úrvalsdeildin: Stórsigur Chelsea og óvænt tap Arsenal

Topplið Chelsea gerði nánast út um leikinn gegn nýliðum Wolves á Brúnni í dag en heimamenn voru komnir í 3-0 þegar rúmar tuttugu mínútur voru búnar af leiknum.

Florent Malouda kom Chelsea á bragðið með marki á 5. mínútu og svo komu tvo mörk frá Michael Essien en staðan var 3-0 í hálfleik.

Markaveislan hélt áfram snemma í síðari hálfleik þegar Joe Cole skoraði fjórða markið en það reyndist jafnframt vera síðasta mark leiksins.

Arsenal lenti í miklum erfiðleikum með að brjóta þéttan varnarmúr Sunderland á bak aftur á leikvangi Ljóssins í dag en staðan var markalaus í hálfleik.

Gestirnir í Arsenal sóttu áfram stíft í síðari hálfleik en Darren Bent kom heimamönnum hins vegar yfir með góðu marki þegar um tuttugu mínútur lifðu leiks.

Andrey Arshavin komst næst því að jafna leikinn fyrir Arsenal á lokakaflanum en skot hans fór rétt framhjá marki Sunderland og niðurstaðan var 1-0 sigur Sunderland.

Mesti hasarinn var hins vegar í fallbaráttuslag Hull og West Ham á KC-leikvanginum þar sem gestirnir í West Ham komust 0-2 yfir snemma leiks með mörkum Guillermo Franco og Jack Collison.

Heimamenn í Hull svöruðu hins vegar með þremur mörkum í lok fyrri hálfleiks og staðan var 3-2 heimamönnum í vil þegar hálfleiksflautan gall.

Bernand Mendy fékk svo að líta rautt spjald hjá heimamönnum snemma í síðari hálfleik og West Ham náðu að jafna leikinn stuttu síðar með marki frá Manuel Da Costa og það reyndist vera síðasta mark leiksins.

Úrslit og markaskorarar:

Liverpool-Manchester City 2-2

1-0 Martin Skrtel (50.), 1-1 Emmanuel Adebayor (69.), 1-2 Stephen Ireland (76.), 2-2 Yossi Benayoun (77.).

Birmingham-Fulham 1-0

1-0 Lee Bowyer (16.).

Burnley-Aston Villa 1-1

1-0 Steven Caldwell (9.), 1-1 Emile Heskey (86.).

Chelsea-Wolves 4-0

1-0 Florent Malouda (5.), 2-0 Michael Essien (12.), 3-0 Essien (22.), 4-0 Joe Cole (56.).

Hull-West Ham 3-3

0-1 Guillermo Franco (5.), 0-2 Jack Collison (11.), 1-2 sjálfsm. (27.), 2-2 Kamil Zayatte (44.), 3-2 Jimmy Bullard (45.), 3-3 Manuel Da Costa (69.).

Sunderland-Arsenal 1-0

1-0 Darren Bent (70.).