Læknir kvennalandsliðsins sá um byrjunarliðið á æfingu í dag

Reynir Björn Björnsson, læknir, sá algjörlega um byrjunarliðið, á æfingu íslenska kvennalandsliðsins í dag. Þær sem byrjuðu á móti Frökkum tóku ekki þátt í sjálfri æfingunni en hlupu þess í stað og gerðu æfingar með Reyni annarsstaðar á vellinum.

„Við prófuðum þetta út í Englandi. Reynir er læknir og hefur mikið verið með mér í undirbúningi og rannsóknarvinnu um hvernig er best að haga endurheimt eftir leik. Hann er mjög vel inn í þessum málum. Daginn eftir leik get ég meira verið með þeim sem hafa spilað minna og tekið þátt í þessu með þeim," sagði Sigurður Ragnar Eyjólfsson, landsliðsþjálfari um fyrirkomulagið.

„Reynir er með þær í góðu prógrammi sem er útpælt. Þær hlaupa allar með púlsklukkur sem eru stilltar út frá þeirra hámarkspúls. Þær eru því má segja í einstaklingsvinnu til þess að jafna sig sem fyrst fyrir næsta leik. Þetta er mjög mikilvægt og svo fara þær á eftir í ísbað, gufu og nudd," segir Sigurður Ragnar og það er hugsað fyrir öllu.

„Við pössum líka vel upp á næringu og orkudrykki og allt þetta. Við gerum allt til þess að þær verði tilbúnar því það er svo stutt á milli leikja," sagði landsliðsþjálfarinn.