Englendingar mæta Brasilíumönnum í vináttuleik í nóvember

Knattspyrnulandslið Englands og Brasilíu munu mætast í vináttulandsleik í Doha í nóvember en enska knattspyrnusambandið tilkynnti þetta á heimasíðu sinni í dag. Þetta verður 23. landsleikur þjóðanna og sá fyrsti síðan þær gerðu 1-1 jafntefli á Wembley fyrir tveimur árum.

Leikurinn fer fram á Khalifa International leikvanginum í Doha í Katar og er hluti af samningi þjóðanna vegna þess að Brasilíumenn komu til London og spiluðu fyrsta landsleikinn á nýja Wembley árið 2007.

„Það er mikilvægt fyrir okkur að fá tækifæri til að spila á móti liði eins og Brasilíu. Með því getum við lært meira um okkar lið og hvernig við þurfum að spila á móti bestu landsliðum heims," sagði landsliðsþjálfarinn Fabio Capello í tilkynningu frá enska sambandinu.

„Við höfum líka mætt Spáni, Hollandi, Þýskalandi og Frakklandi og allir þessir leikir hafa farið fram á útivelli sem er mikilvægur undirbúningur fyrir keppnina í Suður-Afríku," bætti Capello við.

England og Brasilía hafa spilað 22 landsleiki frá upphafi. Brasilíumenn hafa unnið tíu þeirra og níu hafa endað með jafntefli sem þýðir að enska landsliðið hefur aðeins unnið Brassa þrisvar sinnum.