Torres vill fá Villa til Liverpool

Fernando Torres, leikmaður Liverpool, vill að Rafael Benitez stjóri liðsins kaupi David Villa frá Valencia nú í sumar.

Báðir leikmenn eru nú staddir í Suður-Afríku þar sem að spænska landsliðið tekur þátt í Álfukeppninni. Haft er eftir Torres í enska dagblaðinu Daily Star að hann telji að Villa myndi styrkja lið Liverpool.

„Rafa Benitez sér um leikmannakaupin og ég er viss um að þeir leikmenn sem koma í sumar munu styrkja liðið," sagði Torres. „En ef ég mætti ráða myndi ég fá David Villa. En svo gæti verið að það sé ekki hægt."

Þeir Torres og Villa þykja ná einstaklega vel saman í leikjum spænska landsliðsins en báðir skoruðu í 5-0 sigri liðsins á Nýja-Sjálandi á sunnudaginn.