Loksins gengið frá ráðningu Martinez

Enska úrvalsdeildarfélagið Wigan hefur loksins gengið frá ráðningunni á Roberto Martinez í stöðu knattspyrnustjóra.

Martinez var áður stjóri Swansea og náði afar góðum árangri með liðinu. Hann kom liðinu upp úr ensku C-deildinni í fyrra og stýrði liðinu í áttunda sæti B-deildarinnar í vor. Hann þykir með efnilegri knattspyrnustjórum á Englandi en hann er ekki nema 35 ára gamall.

Það er langt síðan að Dave Whelan, stjórnarformaður Wigan, tilkynnti að félagið væri búið að ná samningum við Martinez en viðræður við Swansea um greiðslur bæði fyrir Martinez og síðar aðstoðarmenn hans hafa gengið hægt.

Swansea fór fram á greiðslu fyrir að leysa Martinez og hans menn undan samningum sínum og hafa félögin nú komist að samkomulagi um áðurnefnda greiðslu.

Talið er að Martinez verði formlega kynntur til sögunnar á blaðamannafundi í dag.