Glen Johnson á leið til Liverpool

Allt útlit er fyrir að Glen Johnson sé á leið til Liverpool frá Portsmouth í ensku úrvalsdeildinni eftir að félögin komust að samkomulagi um kaupverð.

Kaupverðið er sagt nema sautján milljónum punda en talið er að bæði Chelsea og Manchester City hafi einnig áhuga á enska landsliðsmanninum. Johnson sjálfur vill hins vegar fara til Liverpool.

Líklegt þykir að Rafael Benitez, stjóri Liverpool, muni selja Ítalann Andrea Dossena til að fjármagna kaupin á Johnson. Jafnvel einnig Alvaro Arbeloa.

Johnson kom til Portsmouth frá Chelsea fyrir tveimur árum síðan á fjórar milljónir punda. Hann átti frábæru gengi að fagna á síðustu leiktíð og gott útlit fyrir að Portsmouth muni græða dágóða upphæð á kappanum.