Ashley Young byrjar í stað Gerrard

Ashley Young verður í byrjunarliði Englands í vináttuleiknum gegn Hollandi á morgun í stað Steven Gerrard sem þurfti að draga sig úr hópnum vegna meiðsla.

Gerrard meiddist í nára á æfingu og fór ekki með landsliðinu til Hollands.

Young á fimm leiki að baki með enska landsliðinu en hann leikur með Aston Villa. Hann kom inn á sem varamaður fyrir Gerrard er England vann Andorra í undankeppni HM fyrr á árinu.

Líklegt þykir að Young muni leika á miðjunni við hlið þeirra Gareth Barry, Frank Lampard og David Beckham.