Ferguson ánægður með sigurinn

Alex Ferguson, stjóri Manchester United, sagðist vera ánægður með sigur sinna manna á Birmingham í ensku úrvalsdeildinni í dag.

Wayne Rooney skoraði eina mark leiksins í fyrri hálfleik en Ferguson sagði mikið í nýliða Birmingham spunnið.

„Leikmenn Birmingham voru mjög ákveðnir og fastir fyrir. Það var erfitt að brjóta þá á bak aftur. Mér fannst það koma best í ljós þegar skoðað er hversu mörg skot þeir vörðu inn í eigin vítateig,“ sagði Ferguson.

„En við gerðum nóg. Við vorum mikið með boltann og sköpuðum okkur nokkur góð færi. Við spiluðum ágætis knattspyrnu og ég er ánægður með úrslitin.“

Michael Owen var nálægt því að skora undir lok leiksins en Joe Hart, markvörður Birmingham, varði frá honum.

„Markvörðurinn varði vel frá honum en ég er viss um að Owen muni skora fyrir okkur. Það er enginn vafi á því. Ég ákvað að byrja með Wayne og Dimitar í dag einfaldlega vegna þess að þeir voru báðir hjá félaginu á síðustu leiktíð og hafa verið fastamenn í liðinu.“