Bolton ætlar loksins að kaupa Veloso

Enska úrvalsdeildarfélagið Bolton hefur lengi verið á höttunum eftir Portúgalanum Miguel Veloso og er enska félagið nú sagt vera nálægt því að ganga frá tíu milljón punda kaupum á miðjumanninum frá Sporting.

Knattspyrnustjórinn Gary Megson hjá Bolton lét nýlega hafa eftir sér að hann vildi breyta um leikstíl hjá liðinu og fyrsta skrefið væri að fá leikmenn sem væru léttleikandi og gætu spilað boltanum. Veloso er því væntanlega ætlað að taka þátt í þessum umbreytingum hjá Bolton en portúgalski landsliðsmaðurinn er búinn að gefa það út að hann væri tilbúinn að spreyta sig í enska boltanum.

Sporting vildi upphaflega fá tæpar þrettán milljónir punda fyrir Veloso en er nú sagt vera tilbúið að lækka kröfurnar vegna slæmrar fjárhagsstöðu félagsins.