Ég hefði aldrei fetað í fótspor Robinho

Spænski landsliðsmaðurinn David Villa hjá Valencia segir að hann hefði aldrei geta gert félagi sínu grikk líkt og þann sem Robinho gerði Real Madrid þegar hann heimtaði að verða seldur frá félaginu.

Villa var orðaður við nokkur stórlið í Evrópu í sumar líkt og Robinho, en er ekki hrifinn af því hvernig Brasilíumaðurinn hélt á sínum málum.

"Ég myndi aldrei koma svon afram við Valencia því ég er þakklátur félaginu fyrir allt það sem það hefur gert fyrir mig. Ég vil með þessu ekki gagnrýna Robinho því ég veit ekki hvað gerðist í hans máli, en ég hefði aldrei gert það sem hann gerði," sagði Villa.

Robinho hafði verið orðaður við Chelsea lengi, en fór til Manchester City á síðustu stundu eftir að nýir eigendur félagsins lögðu fram risatilboð í hann til Real Madrid.