Adams vill fá Vieira til Portsmouth

Tony Adams, stjóri Portsmouth, segist ætla að hafa samband við kollega sinn Jose Mourinho hjá Inter með það fyrir augum að kaupa miðjumanninn Patrick Vieira til Englands á ný.

Adams og Vieira voru liðsfélagar hjá Arsenal í nokkur ár og þekkjast því mjög vel.

Vieira er 32 ára gamall og hefur átt í vandræðum með meiðsli síðustu misseri, en Adams er ekki í nokkrum vafa um að Frakkinn gæti hjálpað Portsmouth.

"Vieira er maður sem ég væri til í að fá hingað ef hann væri á lausu. Ég mun hafa samband við Mourinho og gera fyrirspurn. Maður veit hvað maður fær með Patrick Vieira. Hann er sterkur persónuleiki og sigurvegari," sagði Adams í samtali við Sunday Mirror.