Arsenal á toppinn eftir sigur á Bolton

Arsenal er komið í toppsætið í ensku úrvalsdeildinni eftir góðan 3-1 útisigur á Bolton í lokaleik dagsins.

Bolton hefur ekki gert Arsenal neina greiða á heimavelli sínum Reebok Stadium undanfarin ár og það virtist ekki ætla að breytast þegar Kevin Davies skallaði boltann í netið á 14. mínútu.

Gestirnir frá Lundúnum voru þó hreint ekki slegnir út af laginu og þeir Emmanuel Eboue og Nicklas Bendtner komu Arsenal yfir 2-1 á tveggja mínútna kafla um miðjan fyrri hálfleikinn.

Það var svo Denilson sem innsiglaði sigur gestanna með marki á 87. mínútu. Arsenal missti bakvörðinn sterka Gael Clichy meiddan af velli í leiknum eftir harða tæklingu frá Kevin Davies undir lok fyrri hálfleiks.

Heiðar Helguson sat allan tímann á bekknum hjá Bolton og kom ekki við sögu í leiknum.