Ólympíuörlög Messi í höndum Barcelona

Alþjóðlegi íþróttaáfrýjunardómstóllinn komst að þeirri niðiurstöðu í dag að Barcelona væri heimilt að koma í veg fyrir að Lionel Messi leiki með argentínska landsliðinu á Ólympíuleikunum í Peking.

Dómstóllinn komst að þeirri niðurstöðu að Barcelona, Schalke og Werder Bremen hefðu fulla heimild að kalla til sína leikmenn sem taka þátt í leikunum.

Forráðamenn Barcelona munu funda fljótlega til að taka ákvörðun um hvort að þeir eigi að kalla Messi heim frá Peking.

Argentína mætir Fílabeinsströndinni á morgun og er þjálfari fyrrnefnda liðsins, Sergio Batista, þess fullviss að Messi verði með í þeim leik.

„Leikmaðurinn er hér og verður með liðinu á morgun frá upphafi. Ég er líka viss um að hann verði hér út mótið," sagði Batista.

Schalke og Werder Bremen eru með tvo Brasilíumenn á leikunum, þá Rafinha og Diego.

Alþjóða knattspyrnusambandið, FIFA, úrskurðaði að félögum væri skylt að sleppa öllum leikmönnum, 23 ára og yngri, til að keppa á leikunum.

Áfrýjunardómstóllinn komst hins vegar að þeirri niðurstöðu að þetta væri frekar hefð fremur en lög og því væri ekki hægt að skylda félögin til að gera þetta.