Berbatov spilar væntanlega gegn Liverpool

Dimitar Berbatov mun líklega spila sinn fyrsta leik fyrir Manchester United í hádeginu á laugardaginn þegar liðið sækir Liverpool heim á Anfield.

Sir Alex Ferguson, stjóri United, segist ekki vera búinn að ákveða byrjunarlið sitt á laugardag, en sagði "öruggt" að Berbatov muni koma við sögu í leiknum.

Þá er reiknað með því að vængmaðurinn Albert Riera spili sinn fyrsta leik með Liverpool á laugardaginn eftir að hann gekk í raðir liðsins frá Espanyol.

Hann lék áður með Manchester City sem lánsmaður árið 2006, en þá var fyrsti leikur hans á Englandi einmitt 3-1 sigur City á United.

"Ég man vel eftir leiknum gegn United á sínum tíma og það yrði frábært að endurtaka leikinn. Það yrði fullkomin byrjun á ferli mínum með Liverpool," sagði Riera í samtali við Daily Star.