AC Milan staðfestir áhuga sinn á Adebayor

Ítalska úrvalsdeildarliðið AC Milan hefur staðfest áhuga sinn á framherjanum Emmanuel Adebayor sem leikur með Arsenal.

Milan gekk ekki vel á nýliðinni leiktíð og náði ekki að tryggja sér þátttökurétt í Meistaradeild Evrópu á næstu leiktíð. Forráðamenn félagsins ætla sér ekki að láta það gerast aftur. Félagið hefur verið orðað til að mynda bæði við Didier Drogba og Samuel Eto'o.

„Við skrifuðum Arsenal vegna Emmanuel Adebayor en fengum ekkert svar," sagði Adriano Galliani, varaforseti AC Milan.

Adebayor hefur áður sagt að hann ætli sér að vera áfram í herbúðum Arsenal og jafnvel framlengja samning sinn við félagið en núverandi samningur gildir til ársins 2012.

„Þeir þurfa bara að hringja í mig og þá fá þeir svarið sem þeir eiga skilið," sagði Arsene Wenger, stjóri Arsenal, vegna málsins í síðustu viku.