Benitez vill framlengja við Agger og Kuyt

Rafael Benitez, stjóri Liverpool, vill að gengið verði frá nýjum samningum við þá Daniel Agger og Dirk Kuyt fyrir áramót. Samningar beggja leikmanna renna út í lok næsta tímabils.

Viðræður eru þegar hafnar við fulltrúa Agger og sagði Benitez að aðilar væru „mjög nálægt" því að ná saman. Agger var keyptur frá Bröndby í janúar 2006 fyrir 5,8 milljónir punda en sögusagnir voru á kreiki í heimalandi hans að hann væri óánægður hjá Liverpool.

Agger hefur hins vegar aftur komið sér í byrjunarlið Liverpool eftir að Martin Skrtel meiddist en Agger hefur sagt að ekkert sé hæft í áðurnefndum sögusögnum.

Kuyt var keyptur frá Feyenoord fyrir níu milljónir punda í ágúst 2006 en Benitez sagðist vilja halda þeim báðum.

„Það er ekkert að frétta af samningaviðræðum við Kuyt en það verður að ganga frá samningum þeirra fyrir áramót," sagði Benitez. „Við erum svo sem ekki að falla á tíma vegna þessara leikmanna en ég vil ganga frá þessu eins fljótt og auðið er því það er betra bæði fyrir félagið og leikmennina."