Seta í bókmenntadómnefnd talin Þorsteini til tekna

Árni M. Mathiesen fjármálaráðherra tínir til setu Þorsteins Davíðssonar í dómnefnd Bókmenntaverðlauna Tómasar Guðmundssonar á vegum Reykjavíkurborgar sem eina af röksemdum sínum fyrir skipun hans í embætti dómara við Héraðsdóm Norðurlands eystra og Austurlands.

Veigamestu rökin eru þó þau að Þorsteinn hafi fjölbreytta reynslu og þekkingu, ekki síst vegna starfa sem aðstoðarmaður dómsmálaráðherra um rúmlega fjögurra ára skeið, og það geri hann að hæfasta umsækjandanum um starfið.

Eins og kunnugt er skipaði Árni, sem var settur dómsmálaráðherra í málinu, Þorstein Davíðsson héraðsdómara skömmu fyrir jól. Þrír umsækjendur um stöðuna voru samkvæmt lögbundinni matsnefnd metnir hæfari en Þorsteinn. Tveir þeirra fóru fram á rökstuðning ráðherra vegna málsins og hefur hann nú borist þeim.

Í honum kemur meðal annars fram að Þorsteinn hafi lokið laganámi með 1. einkunn og hann hafi hlotið réttindi til málflutningis fyrir héraðsdómi árið 2005. Þorsteinn hafi verið aðstoðarmaður dómara við Héraðsdóm Reykajvíkur frá 2000-2003 og aðstoðarmaður Björn Bjarnasonar dóms- og kirkjumálaráðherra á árunum 2003-2007.

Bent er á að Þorsteinn hafi gegnt veigamiklum nefndarstörfum á vegum hins opinbera og meðal annars setið í samstarfshópi um löggæslumál í Reykjavík, í innflytjendaráði og flóttamannaráði. Þá hafi hann verið kjörinn varamaður í yfirkjörstjórn Reykjavíkurkjördæmis norður vegna þinkosninga í fyrra.

Þá er tekið fram að Þorsteinn hafi setið í dómnefnd Bókmenntaverðlauna Tómasar Guðmundssonar og enn fremur hafi hann víðtæka reynslu af félagsstörfum þar sem hann hafi gegnt forystustörfum frá unglingsárum.

Þá er bent á að Þorsteinn hafi átta ára reynslu þar sem reynt hafi á lögfræðiþekkingu. Hann hafi sem aðstoðarmaður dómsmálaráðherra öðlast reynslu af stjórnun og skipulagningu starfa. Starf aðstoðarmanns ráðherra reyni á allar hliðar lögfræði og veiti góða innsýn í störf ríkisstjórnar ríkisstjórnar og Alþingis. „Hann hefur í störfum sínum hlotið ágæta þekkingu á íslensku réttarfari og hefur sem aðstoðarmaður dómara góða innsýn í iðkun þess," segir enn fremur í rökstuðningi ráðherra.

Þá er tekið fram að af meðmælum umsagnaraðila megi ráða að Þorsteinn sé ágætur íslenskumaður, eigi auðvelt með að setja fram skýran lögfræðilegan texta og hafi góðan hæfileika til þess að greina aðalatriði frá aukaatriðum.