Keane: Áttum skilið að vinna

Roy Keane, stjóri Sunderland, segir að sigur sinna manna gegn Newcastle í dag hafi verið fyllilega verðskuldaður.

Sunderland vann 2-1 sigur á Newcastle en það var í fyrsta sinn í 28 ár sem Sunderland vinnur sigur á grönnum sínum á heimavelli.

„Þetta var frábær sigur og mér fannst að við áttum skilið að vinna," sagði Keane. „Mér fannst við spila vel og hefðum átt að skora eitt eða tvö mörk til viðbótar."

„Það er frekar langt síðan við unnum Newcastle síðast. Stundum verður maður að taka ákveðna áhættu til að vinna leiki. Það reyndist okkur næstum dýrkeypt þar sem við vorum frekar berskjaldaðir í vörninni. En þetta gekk allt saman upp og leikmenn eiga hrós skilið."