28 ára bið Sunderland á enda

Sunderland vann í dag sinn fyrsta sigur á Newcastle á heimavelli í 28 ár. Lokatölur voru 2-1, heimamönnum í vil.

Djibril Cisse kom Sunderland yfir í fyrri hálfleik en Shola Ameobi jafnaði metin skömmu síðar. Kieran Richardson skoraði svo sigurmark Sunderland beint úr aukaspyrnu í síðari hálfleik.

Joey Barton var á varamannabekk Newcastle eftir að hafa tekið út sex leikja bann og Jonas Gutierrez var einnig á bekknum en hann hefur verið að jafna sig á meiðslum.

Hjá Sunderland var Kenwyne Jones á bekknum sem hefur einnig verið meiddur. Craig Gordon markvörður var hins vegar frá vegna meiðsla.

Heimamenn voru ekki lengi að láta til sín taka. Steed Malbranque átti skot að marki en það er misheppnað. Djibril Cisse var hins vegar á réttum stað og náði að stýra skotinu í markið.

Newcastle neitaði hins vegar að játa sig sigrað svo snemma í leiknum og náði Shola Ameobi að jafna metin fyrir gestina með skalla eftir aukaspyrnu Geremi.

Ameobi komst svo aftur í gott færi í upphafi síðari hálfleiks eftir góðan undirbúning Nicy Butt.

Annars var lítið um færi í leiknum þar til að Sunderland fékk aukaspyrnu þegar síðari hálfleikur var rúmlega hálfnaður. Kieran Richardson tók spyrnuna og skoraði glæsilegt mark með föstu skoti.

Djibril Cisse átti síðan tvö góð skot að marki og það síðarnefnda hafnaði í stönginni. En þar við sat og Sunderland fagnaði dýrmætum sigri.

Joey Barton kom inn á sem varamaður í leiknum eftir að hafa hitað upp síðan snemma í fyrri hálfleik. Á meðan hann hitaði upp fékk hann óblíðar mótttökur hjá stuðningsmönnum Sunderland sem köstuðu í hann smápeningum og einni flösku. Leikurinn var stöðvaður í skamman tíma en Barton virtist láta þetta lítil áhrif hafa á sig.

Sunderland komst upp í áttunda sæti deildarinnar og er nú með tólf stig en Newcastle er enn í næstneðsta sæti með sex stig.