McCarthy jafnaði í uppbótartíma

Benni McCarthy var hetja Blackburn í dag er hann tryggði sínum mönnum eitt stig gegn Middlesbrough með marki á fjórðu mínútu uppbótartíma leiksins.

Afonso Alves hafði komið Boro yfir seint í síðari hálfleik. Hann fékk langa sendingu fram á völlinn, tók boltann niður við vítateigslínuna og skoraði með laglegu skoti.

Roque Santa Cruz átti skot í stöng fyrir Blackburn í fyrri hálfleik en skömmu síðar skoraði Tuncay mark sem var dæmt af vegna rangstöðu.

Gary O'Neil skallaði boltann inn fyrir vörn Boro þar sem Tuncay var mættur og skoraði með glæsilegri bakfallsspyrnu. Sjónvarpsupptaka sýndi að Tuncay var réttstæður og því dómur aðstoðardómarans rangur.

Blackburn er enn í tíunda sæti deildarinnar en nú með tólf stig. Middlesbrough fer upp í þrettánda sæti deildarinnar með níu stig.