Benitez: Skýr skilaboð til annarra liða

Rafa Benitez, stjóri Liverpool, segir að sigur sinna manna á Stamford Bridge séu skýr skilaboð til annarra liða í deildinni.

„Leikmenn sýndu hvers þeir eru megnugir í dag og sigurinn færir þeim mikinn aukakraft fyrir komandi átök," sagði Benitez.

Hann sagði þó að það væri mikilvægt að fylgja sigrinum eftir. Þegar að Liverpool vann Manchester United í haust gerði liðið jafntefli við Stoke í næsta leik.

„Við verðum að ná í þrjú stig í næsta leik okkar sem er gegn Portsmouth," sagði Benitez en leikurinn fer fram á heimavelli Liverpool á miðvikudagskvöldið.

Liverpool varð fyrsta liðið til að vinna Chelsea á Stamford Bridge í deildarleik síðan í febrúar 2004. Alls lék Chelsea 86 heimaleiki í röð án þess að tapa sem er met í efstu deild í Englandi.

„Við getum farið á hvaða völl sem er og unnið leiki. Við mættum mjög góðu og sókndjörfu liði og sýndum að við ætluðum okkur að vinna þennan leik."