Wenger: Rosicky kemur aftur fyrir jól

Arsene Wenger stjóri Arsenal segist vongóður um að tékkneski miðjumaðurinn Tomas Rosicky geti byrjað að spila með liðinu á ný fyrir jól.

Eins og greint var frá í gær vildu fjölmiðlar í Tékklandi sumir hverjir meina að Rosicky gæti jafnvel þurft að leggja skóna á hilluna vegna meiðsla, en það hefur verið borið til baka.

"Rosicky er ekki nálægt því að verða heill, en honum sló ekki niður í batanum eins og margir vildu meina, heldur er hér um mjög erfið meiðsli að ræða og því er bati hans hægur," sagði Arsene Wenger á heimasíðu Arsenal.

"Ég er bjartsýnn á að við verðum farnir að sjá hann spila fyrir jól."