Liverpool felldi heimavallarvígi Chelsea

Chelsea tapaði í dag sínum fyrsta deildarleik á heimavelli síðan 2004 er liðið varð að játa sig sigrað fyrir Liverpool í toppslag helgarinnar í ensku úrvalsdeildinni.

Xabi Alonso skoraði markið strax á tíundum mínútu leiksins. Boltinn barst til hans eftir innkast Dirk Kuyt og tók hann skot að marki úr fremur erfiðri stöðu. Boltinn breytti hins vegar um stefnu á Jose Bosingwa og rataði þar með framhjá Petr Cech í marki Chelsea.

Þetta var reyndar fyrsta deildarmark Liverpool á Stamford Bridge undir stjórn Rafael Benitez.

Chelsea var meira með boltann í fyrri hálfleik án þess að skapa sér mörg færi. Liverpool fékk hins vegar nokkur góð færi í síðari hálfleik og átti Alonso til að mynda skot í stöng úr aukaspyrnu.

Chelsea fékk svo ágætt tækifæri til að jafna leikinn er Franco Di Santo skallaði boltann fyrir fætur Ashley Cole en skot hans missti marks.

Liverpool kom sér á topp ensku úrvalsdeildarinnar með sigrinum og er með þriggja stiga forystu á bæði Chelsea og Hull.

Þetta var fyrsta tap Chelsea á heimavelli síðan í febrúar 2004 en alls lék liðið 86 deildarleiki í röð á heimavelli án taps sem er vitanlega met.