Tryggvi: Ég gleymdi mér í gleðinni - Myndband

„Auðvitað sé ég eftir þessu. Þetta var kjánalegt. Ég gleymdi mér bara í gleðinni," sagði Tryggvi Guðmundsson í samtali við Vísi í dag.

Tryggvi fékk að líta gula spjaldið í leik FH og Keflavíkur í gær fyrir óíþróttamannslega framkomu og að ögra leikmönnum Keflavíkur. Eftir að FH skoraði sigurmark sitt í leiknum undir lokin fagnaði Tryggvi markinu beint fyrir framan leikmenn Keflavíkur.

Markið þýddi að FH á enn möguleika á Íslandsmeistaratitlinum en jafntefli hefði þýtt að Keflavík hefði orðið Íslandsmeistari.

„Það fór í taugarnar á mér hvenig þeir fögnuðu seinna markinu - bara eins og þeir væru orðnir Íslandsmeistarar. Það kveikti í mér."

„Svo átti ég sjálfur þátt í markinu okkar og það er bara ekki kveikt á öllum perum þegar svona atriði kemur upp. Ég baðst líka afsökunar á þessu eftir leik enda óhugsað og kjánalegt. Ég sá eftir þessu strax."

Þetta var fjórða gula spjald Tryggva í sumar sem þýðir að hann verður í banni í lokaumferðinni þegar FH fer í heimsókn í Árbæinn. Þriðja gula spjaldið fékk hann er hann fagnaði sínu 100. marki á ferlinum í leik gegn Val.

„Spjaldið sem ég fékk í gær var alveg klárt en hitt öllu verra. Mér fannst það mjög strangt að gefa mér gult fyrir að fagna þetta stórum áfanga. Það sem ég gerði var heldur ekki gróft. Ég lyfti upp treyjunni og sýndi C-ið."

Tryggvi segir að keppnisskapið hafi oft komið sér í vandræði en utan vallar sé hann öllu skapbetri.

„Það er fullt af fólki sem heldur að ég sé algjör bastarður og hef ég fundið fyrir því sjálfur. Ég er samt ljúfur drengur og vill engum illt, þó svo að ég geti verið alveg bandvitlaus inn á vellinum."