Dóttir Boulahrouz látin

Nýfædd dóttir Khalid Boulahrouz, leikmanns hollenska landsliðsins, og eiginkonu hans lést í gær en hún var fyrirburi.

Fram kom í fréttatilkynningu hollenska knattspyrnusambandsins að Boulahrouz hafi yfirgefið herbúðir landsliðsins í gær um leið og fréttist að eiginkona hans, Sabia, hefði verið flutt upp á sjúkrahús.

Boulahrouz hefur verið í byrjunarliði hollenska landsliðsins í öllum leikjum liðsins á EM 2008 til þessa en liðið mætir Rússlandi í fjórðungsúrslitum keppninnar á laugardaginn kemur.