Telur að Gallas haldi bandinu

Nigel Winterburn, fyrrum leikmaður Arsenal, telur að Arsene Wenger muni ekki taka fyrirliðabandið af William Gallas þrátt fyrir ummæli hans um samherja sína.

„Ég þekki Arsene og hann er pottþétt mjög sár yfir ummælunum. En að taka fyrirliðabandið af Gallas mun ekki bæta neitt," sagði Winterburn í viðtali við BBC.

Gallas gagnrýndi samherja sína harðlega í gær og sagði að mórallinn í leikmannahópi Arsenal væri ekki upp á það besta. Þetta er ekki í fyrsta sinn sem talað er um hvort Gallas haldi fyrirliðabandinu.

Viðbrögð hans eftir jafntefli við Birmingham á síðasta tímabili þóttu ekki fyrirliða sæmandi og fyrr á þessu tímabili náðist mynd af honum að yfirgefa skemmtistað með sígarettu í munninum.

Meðal þess sem hann sagði í viðtali í gær var að ónefndur leikmaður væri að eyðileggja móralinn innan liðsins. „Ég held að fyrirliðabandið verði ekki tekið af Gallas. Arsene hefur sýnt honum traust til að leiða liðið, ef hann breytir því eru það skýr skilaboð um að hann treystir honum ekki. Á maður að velja leikmenn í liðið sem maður treystir ekki? Það held ég ekki," sagði Winterburn.