Leikmenn skortir hugrekki

William Gallas segir að leikmenn Arsenal þurfi að herða sig ef þeir ætli sér að gera alvöru atlögu að enska meistaratitlinum.

Arsenal tapaði um helgina fyrir Aston Villa, 2-0, og hefur alls tapað fjórum leikjum á leiktíðinni. Liðið er níu stigum á eftir toppliðum Chelsea og Liverpool.

Gallas er fyrirliði Arsenal og sagði í samtali við fréttastofu AP að leikmenn hafi skort hugrekki.

„Við þurfum að vera sem hermenn á leið í baráttu. Ef lið ætla sér að verða meistari þurfa leikmenn að berjast fyrir sínu í hverjum einasta leik."

„Við erum að mæta liðum sem óttast það ekki að leika gegn Arsenal. Það er hættuleg þróun fyrir félagið. Við verðum að vera stríðsmenn. Það er þannig sem leikmenn skapa sér karakter og afla sér reynslu."