Enn eitt tap Tottenham

Hrakfarir Tottenham halda áfram en liðið tapaði 1-2 fyrir Aston Villa í ensku úrvalsdeildinni í kvöld. Tottenham er í neðsta sæti með aðeins eitt stig eftir fjóra leiki.

Sigur Aston Villa var virkilega verðskuldaður. Nigel Reo-Coker kom Villa yfir á 5. mínútu og Ashley Young bætti síðan við marki eftir slæm mistök hjá Gomes í marki Tottenham sem missti boltann undir sig.

Darren Bent minnkaði muninn fyrir Tottenham á 87. mínútu þegar Jermaine Jenas skaut í hann og inn. Þrátt fyrir þunga pressu undir lokin náði Tottenham ekki að jafna.

Aston Villa er í fjórða sæti deildarinnar með sjö stig eftir fjórar umferðir.