Neita fullyrðingum Curbisley

Ásgeir Friðgeirsson, stjórnarmaður hjá West Ham, vísar á bug fullyrðingum Alan Curbisley í gær þar sem hann sagði að trúnaðarbrestur hefði verið aðalástæða þess að hann sagði af sér sem knattspyrnustjóri félagsins.

Curbishley sagði að stjórn West Ham hefið tekið fram fyrir hendur sínar í leikmannamálum og þar hefði verið um trúnaðarbrest að ræða. Þessu vísar Ásgeir á bug í samtali við BBC í dag.

"Félagið samþykkti áætlun um fé til leikmannakaupa á stjórnarfundi í apríl. Alan samþykkti þessar áætlanir, en var tregur til að taka þær ákvarðanir sem taka þurfti varðandi leikmannahópinn," sagði Ásgeir og bætti við að Curbisley hefði betur látið í ljós óánægju sína strax í vor þar sem hann sat stjórnarfundi.

Ásgeir ver líka ákvörðun West Ham um að láta fleiri menn koma að leikmannakaupum félagsins, en þar hafa framkvæmdastjórinn Scott Duxbury og tæknistjórinn Gianluca Nani nú mikið að segja eftir uppstokkun innan félagsins.

"Við viljum ekki að allar ákvarðanir um leikmannakaup hangi á herðum eins manns, því það getur komið sér mjög illa ef hann hverfur skyndilega á brott. Við viljum koma á góðu skipulagi og byggja á enskum leikmönnum sem eiga rætur í unglingastarfi félagsins."

Leit West Ham að nýjum knattspyrnustjóra er hafin að sögn Ásgeirs og þar verður leitað að "hæfum manni sem fellur inn í stefnu félagsins" og vonast West Ham menn til að hafa fimm til sjö nöfn sem koma til greina í næstu viku.

Ásgeir vísaði því á bug að þegar væri búið að finna eftirmann Curbishley.