Milosevic heiðraður í Serbíu

Framherjinn Savo Milosevic mun spila sinn fyrsta og síðasta leik fyrir knattspyrnulandslið Serbíu þegar það mætir Búlgaríu í vináttulandsleik þann 19. nóvember.

Hinn 35 ára gamli Milosevich, sem um síðustu helgi varð Rússlandsmeistari með liði sínu Rubin Kazan, skoraði á sínum tíma 35 mörk í 101 landsleik fyrir Júgóslavíu og síðar Serbíu og Svartfjallaland.

Milosevic var í HM-liði Júgóslavíu árin 1998 og 2006 og varð markakóngur á EM árið 2000 þegar liðið komst í fjórðungsúrslit.

Hann hefur hinsvegar ekki spilað landsleik fyrir Serbíu síðan landið var aðskilið frá Svartfjallalandi. Á heimasíðu serbneska knattspyrnusambandsins kemur fram að vináttuleikurinn í þessum mánuði sé kjörinn vettvangur til að heiðra mann sem hafi spilað með landsliði sínu í gegn um umbrotatíma.

Milosevic skoraði 74 mörk í 98 leikjum fyrir Partizan Belgrad áður en hann gekk í raðir Aston Villa. Á Englandi skoraði hann 29 mörk í 91 leik fyrir Villa og varð deildabikarmeistari með liðinu árið 1996.

Þaðan fór hann til Spánar þar sem hann spilaði með Zaragoza, Espanyol, Celta Vigo og Osasuna.

Hann gekk í raðir rússneska liðsins Rubin í mars sl. og skoraði svo sigurmark liðsins í 2-1 sigri á Saturn Ramenskoye um helgina, en sigurinn tryggði liðinu fyrsta Rússlandsmeistaratitilinn í sögu félagsins.