Fundi lokið í Ráðhúsinu

Hanna Birna Kristjánsdóttir, oddviti sjálfstæðismanna í borgarstjórn, Vilhjálmur Þ. Vilhjálmsson borgarfulltrúi sjálfstæðismanna og Ólafur F. Magnússon borgarstjóri, sem hafa fundað í Ráðhúsi Reykjavíkur frá hádegi í dag, luku fyrir stuttu fundi sínum, að svo virðist án niðurstöðu.

Hanna Birna og aðrir helstu ráðamenn Ráðhúsins, neituðu að tala við fjölmiðla eftir fundinn.

Samkvæmt heimildum Vísis var freistað þess að ná samkomulagi um ágreiningsefni sem hafa komið upp í meirihlutasamstarfinu að undanförnu.

Óskar Bergsson úr Framsóknarflokkunum hefur verið bendlaður við meirihlutasamstarfið en sjálfur neitar Óskar öllum fregnum þess efnis að einhverjar viðræður hafi átt sér stað.

Heimildir Vísis herma að á meðal stærstu ágreiningsefna meirihlutans sé verktakasamningur sem gerður var við fyrirtæki Gunnars Smára Egilssonar, um að gera úttekt á upplýsingamálum hjá Reykjavíkurborg. Þá hafi jafnframt verið deilt um ákvarðanir varðandi starfsmannahald í Ráðhúsinu.

Einar Mar Þórðarson, stjórnmálafræðingur, sagði í fréttum Stöðvar 2 að litlar líkur séu á því að núverandi meirihluti standi út kjörtímabilið. Næstu klukkustundir muni hins vegar ráða mestu um framtíð hans.