Wenger hefur áhyggjur af erlendum fjárfestum

Arsene Wenger, knattspyrnustjóri Arsenal, telur að knattspyrnan á Englandi sé í hættu vegna að komu erlendra fjárfestra að knattspyrnufélögum þar í landi.

Hann segir að það sé mikilvægt að félög þekki sín fjárhagsleg takmörk í stað þess að það geti endalaust leitað í djúpa vasa vellauðgra eigenda þeirra.

„Ef maður ýtir hlutunum of langt hverfa allar reglur fyrir bí," sagði Wenger. „Það er ekkert rökrétt við það að nefna upphæðir í fjölmiðlum. Það setur allt úr jafnvægi."

Nýjasta dæmið er þegar að Abu Dhabi United Group keypti Manchester City og um leið keypti Robinho frá Real Madrid fyrir metupphæð. Hann hafði verið sterklega orðaður við Chelsea en Manchester City bauð einfaldlega betur.

„Það veldur mér áhyggjum þegar að leikmaður semur við félag og degi síðar veit hann ekki hvaða félag hann samdi við. Það er varla hægt að segja að það sé góð þróun," sagði Wenger.

Þarna átti hann við blaðamannafund sem átti sér stað skömmu eftir að Robinho samdi við City. Hann hins vegar talaði um að hann hefði farið til Chelsea á fundinum.

„Fótbolti er ekki eins og stórmarkaður. Það þurfa allir að skilja það."