Owen vill eflaust fara frá Newcastle

Graeme Souness, fyrrum knattspyrnustjóri Newcastle, segist viss um að Michael Owen og fleiri leikmenn liðsins óski þess að fara frá félaginu vegna þeirrar ólgu sem ríkt hefur undanfarið.

Souness var síðast hjá Newcastle árið 2006 og í samtali við Daily Star sagðist hann óttast að leikmenn liðsins væru hreinlega búnir að fá nóg af vandræðagangi félagsins.

"Ég efast um að Michael Owen sé eini leikmaður liðsins sem hugsar sér til hreyfings sem fyrst. Kevin Keegan var gríðarlega vinsæll knattspyrnustjóri og ég er viss um að leikmennirnir eru margir hverjir að íhuga framtíð sína," sagði Souness.

Newcastle er enn án knattspyrnustjóra síðan Keegan sagði af sér og eigandinn Mike Ashley hefur lýst því yfir að hann óski eftir að selja félagið.