Ince ekki til Newcastle

Paul Ince hefur útilokað að taka við Newcastle og segist vera nýbyrjaður á langtímaverkefni hjá Blackburn.

Ince var ráðinn til Blackburn í júní síðastliðnum. „Framtíð mín liggur hjá Blackburn enda hef ég aðeins verið hérna í fimm mínútur," sagði hann eftir að hans menn töpuðu fyrir Arsenal í gær.

„Ég er aðeins að einbeita mér að Blackburn. Það er mikið verk að vinna hjá félaginu og þetta er langtímaverkefni. Ég hef rætt við John Williams framkvæmdarstjóra og ég er mjög ánægður hér. Ég hlakka til að takast á við verkefnin sem eru framundan og ekkert hefur breyst."

Newcastle er enn án knattspyrnustjóra eftir að Kevin Keegan hætti en liðið tapaði fyrir Hull á heimavelli í gær, 2-1.