Kemst Tottenham af botninum?

Einn leikur er á dagskrá í ensku úrvalsdeildinni í knattspyrnu í kvöld en það er viðureign Tottenham og Aston Villa sem hefst klukkan 19 og verður sýndur beint á Stöð 2 Sport.

Tottenham þarf svo sannarlega á sigri að halda í kvöld enda eru lærisveinar Juande Ramos í botnsæti deildarinnar með aðeins eitt stig eftir þrjá leiki. Þetta er annað árið í röð sem liðið byrjar hörmulega í deildinni.

Enn og aftur tippuðu sérfræðingar á að Tottenham myndi veita toppliðunum fjórum harða keppni, en enn og aftur hefur annað komið í ljós.

Tapi Tottenham fyrir Villa á heimavelli sínum í kvöld, yrði það versta byrjun félagsins í deildinni frá stofnun úrvalsdeildarinnar.

Aston Villa hefur reyndar ekki byrjað allt of glæsilega heldur þrátt fyrir góðan 4-2 sigur á Manchester City á opnunardegi leiktíðarinnar.

Villa hefur reyndar aðeins tapað einum af síðustu sjö leikjum sínum í öllum keppnum, en aðeins inn sigur í síðustu sex deildarleikjum þykir ekki viðunandi hjá lærisveinum Martin O´Neill.

Mörgum er enn í fersku minni leikur þessara liða í fyrra, en þá náði Villa 4-1 forystu gegn Tottenham en þurfti að sætta sig við eitt stig. Villa hefur ekki náð að sigra í síðustu átta leikjum sínum á White Hart Lane.

Til greina kemur að tveir leikmenn fái jafnvel sæti í byrjunarliði Tottenham í fyrsta skipti í kvöld, en það eru Rússinn Roman Pavlyuchenko og Króatinn Vedran Corluka, sem keyptir voru rétt fyrir lokun félagaskiptagluggans.

Möguleg byrjunarlið í kvöld:

Tottenham: Gomes, Corluka, Woodgate, King, Bale, Bentley, Zokora, Jenas, Modric, Dos Santos, Pavlyuchenko.

Aston Villa: Friedel, L Young, Laursen, Davies, Shorey, Reo-Coker, Petrov, Barry, A Young, Carew, Agbonlahor.