Doktor limur fyrir dóm eftir helgina

Mál danska lýtalæknisins Jørn Ege, sem nefndur hefur verið penislægen upp á dönsku eða limlæknirinn, verður þingfest fyrir héraðsdómi í Kaupmannahöfn á mánudaginn, en hann er ákærður fyrir stórfelld skattsvik.

Ege rak í áraraðir læknastofu ásamt fyrrum unnustu sinni og fékkst einkum við að stækka getnaðarlimi manna. Fleira stækkaði þó ört í leiðinni, einkum eignasafn læknisins sem á mikið safn glæsibifreiða, rándýrt heimili og mikið vopnasafn.

Tölur á skattaskýrslunni hans hafa ekki bólgnað út til samræmis við þetta og grunar ákæruvaldið hann um að hafa snuðað ríkiskassann um sem nemur tæpum 100 milljónum íslenskra króna.