Deco og Southgate bestir í ágúst

Miðjumaðurinn Deco hjá Chelsea og Gareth Southgate stjóri Middlesbrough voru í dag útnefndir leikmaður og knattspyrnustjóri mánaðarins í ensku úrvalsdeildinni.

Deco var ekki lengi að láta til sín taka hjá Chelsea eftir að hann var keyptur til félagsins fyrir 8 milljónir punda frá Barcelona.

Soutgate var að vinna til þessara verðlauna í fyrsta skipti á ferlinum og er lið hans sem stendur í sjötta sæti í deildinni eftir tvo sigra í fyrstu þremur leikjunum.

Hann er aðeins annar maðurinn til að vinna til þessara mánaðarlegu verðlauna bæði sem leikmaður og knattspyrnustjóri, en áður hafði Stuart Pearce náð þessum áfanga frá stofnun úrvalsdeildarinnar.

Soutgate var kjörinn leikmaðuri mánaðarins í janúar árið 2000 þegar hann lék með Aston Villa. Hann er fyrsti stjóri Middlesbrough til að vera kjörinn stjóri mánaðarins síðan Terry Venables afrekaði það árið 2001.