Kínverjar ósáttir við sendingu eldflaugahluta

Kínversk stjórnvöld lýstu í dag andúð sinni á sendingu frá Bandaríkjunum sem innihélt hluta í skotflaugar og fór að sögn bandarískra hermálayfirvalda til Taiwan fyrir slysni. Þetta gerðist haustið 2006 en að sögn Michael Wynne, yfirmanns flughers Bandaríkjanna, uppgötvuðust mistökin ekki fyrr en í síðustu viku. Hélt Wynne því fram að í stað rafgeyma í þyrlur, sem vera hefðu átt í sendingunni, hefðu fjórar hvellhettur í skotflaugar farið til Taiwan. „Við minnum Bandaríkjamenn enn einu sinni á að standa við skuldbindingar sínar samkvæmt Sino-sáttmálanum frá 17. ágúst og hætta vopnasölu til Taiwan auk allra samskipta við hermálayfirvöld þar til þess að stofna ekki ríkjandi friði og samskiptum samkvæmt sáttmálanum í hættu," sagði í yfirlýsingu frá kínverska utanríkisráðuneytinu sem birt var á vefsetri þess.

Búnaðurinn, sem vistaður hafði verið í geymslu í Taiwan, var sendur frá vörugeymslu Bandaríkjahers í Utah á sínum tíma og leggja talsmenn hersins áherslu á að búnaðurinn hafi ekki tengst kjarnavopnum eða verið ætlaður til nota í slík vopn. Herinn gaf það enn fremur út að málið yrði rannsakað ítarlega en hjá svo stórri stofnun væri ekki hægt að fyrirbyggja með öllu að mistök yrðu.